【Now新聞台】截至早上11時，1小時内《彭博》用戶關注度上升最多的港股依次為中芯國際、農夫山泉、雷蛇、京東物流及長實集團。
中芯出咗第三季季績，收入毛利率新高，高盛話佢第四季指引高過預期。中芯高層人事變動引起關注，到任不到一年嘅副董事長蔣尚義離職，梁孟松辭任執董，但繼續做CEO。去年中芯請蔣尚義時都引發一輪風波，中芯嘅業績係咪抵唔過高層人事變動？市場對中芯內部管理、人事鬥爭係咪會有擔心？
大華繼顯執行董事梁偉源指，中芯第三季業績好同第四季前膽唔錯都帶畀市場好嘅信息。不過中芯嘅高層變動亦同時令人擔心，因為去年蔣尚義加入，市場期望可以靠佢嘅關係，幫中芯突破買高端生產設備嘅限制。蔣尚義離職，意味住佢嘅努力冇突破性發展。中芯嘅競爭對手台積電喺美國同日本設廠，中芯嘅科技水平冇提升，好難同人競爭。高層變動，令人擔心中芯喺中長線發展會有大限制。
