【Now新聞台】截至早上11點，1小時内《彭博》用戶關注度上升最多的港股，依次為騰訊控股、農夫山泉、中國海外發展、長實集團、閱文集團。
騰訊控股首季多賺65%，但經調整純利差過預期，集團話會將今年部分增加利潤，投資喺企業服務、遊戲及短視頻內容，即係避開咗金融業務，又會攞500億人仔做公益事業，呢啲舉動會唔會令市場認為，騰訊高增長期已經過去。
大華繼顯執行董事梁偉源指，雖然騰訊呢份業績唔算太差，但睇返四大業務收入增長，增速最快係金融科技及雲業務，但公司未來唔係聚焦呢啲業務，如果繼續以遊戲呢啲原有業務做主力，而今次份業績睇到呢啲業務增長已經放緩，咁未來增長點會喺邊度？點樣重拾高增長？都係一個問號，導致大行削騰訊目標價，令股價今日要捱沽。
