【Now新聞台】截至早上11點,1小時內《彭博》用戶關注度上升最多的港股,依次為江西銅業、中國移動、新鴻基地產、中國鋁業、新世界發展。
有色金屬持續強勢,今朝有兩隻資源股上榜,江銅股價衝上近9年半高位,暫時已連升第9日,累升近60%,今日一度再大升19%,江銅股價有冇炒過龍?
圓通環球金融集團行政總裁曾永堅認為,江銅股價升因為水多,加上近排全球各地陸續接種疫苗,市場炒環球經濟復甦,令資金流入商品市場,加上美國總統拜登上任後,市場預期美國會出招應對氣候變化問題,令鋁、銅需求增加。技術走勢方面,江銅RSI已經超買,Jasper話,中資資源股係北水最新炒作目標,只要內地貨幣政策唔變,估計北水短期都會繼續湧入。