【Now新聞台】截至早上11點，1小時內《彭博》用戶關注度上升最多的港股，依次為盈富基金、福萊特玻璃、騰訊控股、龍源電力、保利協鑫能源。
福萊特股價五連跌，暫時累跌約18%，股價今早一度低見30.1元。
公司噚日發通告，提醒「福萊轉債」仲有12日就到期，呢批A股可換股債券(CB)，噚日收市價約290元(人民幣．下同)，但贖回價僅100元。
福萊特A股做緊38元左右，換股價約17.5元，平2倍有多，換股價咁低，令市場憂慮債轉股後，股價會面臨更大沽壓。
耀才證券研究部副經理譚智樂指，福萊特跌咁勁，係跟成個新能源板塊向下調整，因為之前升咗唔少，好多資金順勢借福萊特換股消息獲利調整。
譚智樂估計，福萊特股價短期好大機會下試30港元以下水平，但佢仍睇好新能源板塊前景，起碼今年上半年仲有得炒。
