【Now新聞台】截至早上11點，1小時內彭博用戶關注度上升最多的港股，依次為中國電信、中國聯通、中國移動、蒙牛乳業及中國石化。
聯通、中電信及中移動今早跟隨大市向下，之後紐交所突然話，無計劃再要求中資電訊股除牌，三隻股份掉頭抽升，值得留意係，雖然冇咗「除牌令」，但仍然有一個「禁投令」。
京華山一國際研究部主管彭偉新指，若美國繼續大力遏止中資企業喺美國上市，對美國自身發展，以至對環球資本市場嘅影響力都會下降，佢又話，唔少投資者認為除牌事件對中企影響有限，相信當市場消化咗除牌消息後，股價會跟隨經濟反彈。
彭偉新認為，即使民主黨奪得參議院控制權，唔代表會對中國「減辣」，佢又估計，民主黨初期可能會維持特朗普頒布嘅行政命令，之後再同中國談判。
