【Now新聞台】截至早上11點，1小時內《彭博》用戶關注度上升最多嘅港股，依次為長實集團、長和、新世界發展、中國平安、龍源電力。
兩隻本地地產股長實及新世界齊上榜，除咗多人搜尋，股價都跑贏，係咪反映樓市出現「小陽春」？因為剛過去嘅周末，二手成交係36周以嚟最多，新盤收飛亦唔錯，似乎終於輪到地產股郁。
京華山一國際研究部主管彭偉新表示，本地地產股喺過去一年表現好差，主要係疫情影響銷售，加上經濟續處於收縮期，資金都唔吼「磚頭股」，不過，呢啲股份嘅估值已跌至近十年低位，股價有一定吸引力。佢又話，依家市場開始寄望樓市出現「小陽春」，加上新盤收飛唔錯，都帶動呢啲股份反彈，由於長實、新世界近期都有樓賣，投資者就攞佢哋試水溫，如果可以吸引到更多資金追入，有望帶起成個板塊。
