【Now新聞台】截至早上11點止，《彭博》Top Search No.1為中國移動，第2至第5位為世茂房地產、永利澳門、中國平安及友邦保險。
中移動係早段升幅最大嘅藍籌股，主要係摩根士丹利首次將佢評級由「沽售」升至「增持」，目標價大升至85元，最牛仲睇至110元添。
大華繼顯執行董事梁偉源指，自從中美簽咗首階段貿易協議之後，有好多早前升得多嘅股票都開始獲利回套，市場依家開始追落後股，而事實上中移動已經落後咗好耐，加上憧憬如果大家轉用咗5G服務後，估計都返唔到轉頭，所以佢係有上升嘅空間。但Steven補充話，如果中移動要上到110元，就應該等到5G服務發展順利同好多人用先有機，而今日曾見嘅70元係阻力位，預料佢都可以上到85元。
