【Now新聞台】截至早上11點止，《彭博》Top Search No.1為中國平安，第2至第5位為吉利汽車、騰訊控股、中國恒大及比亞迪股份。
美國財長姆努欽指，喺達成第二階段貿易協議之前，美國將維持現行對中國商品加徵嘅關稅。美國一直都希望中國可以買多啲佢哋嘅農產品，但因為貿易戰，美國嘅農民就承擔咗大部份中國反制關稅嘅威力，依家美國每年對華嘅農產品出口量由250億美元落到70億美元，關稅收多咗，貿赤縮窄咗，但農民就成為受害者。不過，農民嘅比例都唔高，所以對貿赤影響都少啲。
不過，即使對農民嘅影響唔大，但內地喺美國投資嘅影響就好大。中國喺美國投資由高峰期540億去到2019上半年縮到得25億，而美國企業喺中國分公司同業務都因為雙邊緊張而影響信心度。似乎以呢啲數據嚟講，每人都係貿易戰中嘅輸家。
