【Viu】Edan呂爵安@MIRROR、Day許軼@COLLAR、小儀、Elvin黃梓僑今日齊齊現身汽水活動。Edan最近孖Ali拍電視劇《悠長假期》，佢話進度良好，大讚女神好玩得合作火花唔錯，但二人嘅親熱戲仲未拍，更未影到女神黑圖。Edan又爆9月尾會出團歌，咁萬眾期待嘅團con到底係幾時？佢叫大家留定錢買飛，係聖誕節嗎？至於老best Jeffrey被爆月租13萬住半山複式戶，同Tyson Yoshi為鄰，Edan話祝福對方，但就未獲邀去新居參觀，更自嘲要努力搵錢。
Day今日推出solo歌《你離開我的時候神奇的事發生了》，佢多謝師兄AK為MV做男主角，更透露本來安排師兄演渣男，最後變咗傷心男，又爆自肥搵咗另一大隻男星演出MV，唔通係亨仔？講到COLLAR日前出咗新專輯，Day話有課金買咗十幾廿隻送朋友，咁Edan師兄識唔識做？佢仲即場同師妹𢱑折添！
另外，小儀亦多謝Edan帶挈埋佢做活動主持賺錢，又心痛兒登為工作瘦晒！提到早前森美喺電台節目自爆N年前曾想追容祖兒，小儀笑老友「冇用」，得把口唔夠膽表白，又爆森美多年來都鍾意𥄫靚女，仲有本集郵簿專集靚女明星，但得個睇字唔會行動，叫梁太放心。想喺放工前笑吓，就嗱嗱聲入嚟睇片呀！
