【Viu】劉青雲、鄧濤、周家怡等今日現身新片《復仇的人》探班活動，青雲演網絡「偵探」，角色介乎好與壞之間，見佢清減咗不少，臉龐瘦削更黑實，青雲笑稱太熱，因為市民劉先生忙住買餸？青雲又認「老」話而家唔用文字版劇本，貪可以放大啲字，so cute！鄧濤首同4屆影帝合作又有冇俾對方氣場嚇親？至於演老師嘅家怡早前不慎傷腰，椎間盤裂開要留院兩日，目前偶爾要靠行山拐杖輔助。
Hazel林熙彤同VALC張鈊貽就演中學同學，VALC要放棄原有金毛look，仲話染黑髮初期嚇親屋企嘅工人姐姐添！Carina李晞彤就演爛蒲妹。Hazel嘅角色要跳樓，佢話喺屋企睇劇本都崩潰，至於早前傳同湯令山拍拖，仲被影到一齊行街，Hazel承認嗰個係自己，但就只以「哦」避答係咪拍拖，問佢有冇聽《玻璃》？是咪Gareth.T口中「最重要嗰個人」？佢就話要問返對方。咁有冇親友要求代訂Gareth演唱會飛？Hazel講咗句：「今日唔知聽日事！」有咩玄機？
Kenji范麒智喺戲中演渣男，佢沾沾話艷福無邊，所有女都俾佢「渣」過，佢同Arvin曾傲棐、Dark黃明德演中同，Arvin開心演有錢仔，Dark就笑稱角色同本尊一樣又傻又純。
另外，Sammy沈震軒就演牙尖嘴利律師，佢話09年喺青雲、古天樂主演嘅《撲克王》有過一面之緣，當時喺加拿大回流，僅有一兩句對白，事隔多年唔敢高攀前輩講舊事。早前都揸過Uber嘅Sammy又指有留意呂方同司機嘅爭執對話影片，佢話唔同意網暴，po片者行為要不得。Sammy又坦言做藝人只能無奈硬食。快啲入嚟睇片啦！
