【Viu】劉青雲憑《爸爸》勇奪《第18屆亞洲電影大獎》嘅「最佳男主角」，仲同上屆影帝兼今屆「終身成就獎」得主役所広司合照，對於被指氣質相似，青雲謙稱：「佢型好多！」役所広司就笑認自己大過青雲好多，驚對方知道似自己會唔開心，惺惺相惜嘅兩位仲話想合作添！
當青雲聽到全場起哄叫「爸爸」嗰陣，笑到酒粒都飛出晒嚟，又話依家好多人嗌自己「爸爸」，亦想約齊「一家人」慶祝。青雲又話聽到現場傳媒嘅歡呼聲好感動，同時好緊張，仲勾起第一次攞金像影帝嘅回憶，希望大家將歡呼聲送畀所有香港電影，正能量滿滿呀！
至於「最佳男、女配角」就成為「台灣幫」李康生同楊貴媚嘅囊中物，李康生High爆示範喺戲中被刪剪嘅舞蹈；媚姐就公開向役所広司示愛，笑爆全場！
此外，最近是非不斷嘅台星吳慷仁，雖然榮獲「AFA新世代獎」，但全程「神隱」，除咗有上台領獎外，只閃現紅地氈環節，連後台訪問都缺席！
