【Viu】米雪為慶祝入行55周年、連續兩晚喺麥花臣場館舉行首個演唱會《友你有米55派對騷》，昨晚（14日）嚟到尾場。台上亦星光燿熠，被米雪指撞樣妹妹雪梨嘅劉雅麗，今晚同雪姐合唱《你你你為了愛情》，更重演劇集《我和春天有個約會》中一段情節，仲現場送上一對耳環畀雪姐添！
82歲嘅葉振棠就襯晒雪姐着粉紅歌衫登場，而噚晚中氣十足嗌爆咪嘅家英哥今晚繼續踏台。最俾面都係夏雨，特登由加拿大飛返嚟撐老best。雪姐仲拎夏生將西貢豪宅改名做「雨房」嚟講笑，好正呀！
戲肉就梗係兩大阿姐陸續登場，薛家燕孖雪姐合唱《戲鳳》，唱完後家燕姐獲粉絲送公仔，出名風趣嘅燕燕又爆seed：「係咪俾我個孫㗎？」今晚雪姐依然有緬懷離世16年嘅男友尹志強環節，仲感觸話：「知道佢有嚟現場睇我表演。」
壓軸嘉賓係汪明荃，阿姐一出場即大讚雪姐靚絕五台山之餘，兼做人圓滑、懂人情世故，獲阿姐認證真係夠威呀！其後二人合唱《萬水千山總是情》。最後大部分表演嘉賓上台同雪姐逐一擁抱，係愛呀！另外今晚睇騷嘉賓有鄺美雲、尹光、狄龍太太陶敏明、湯怡、何鴻燊太太梁安琪等人，真係好似開party咁開心！
