【Viu】現年70歲米雪今晚喺麥花臣場館舉行入行55周年首個演唱會《友你有米55派對騷》，雪姐人緣勁好，請嚟好多老友撐場合唱，打頭陣有白彪陪唱《射雕英雄傳》，到文雪兒、魏秋樺、羅樂林出場，羅樂林自爆花名「囉囉攣」係雪姐當年傑作。其後石修孖雪姐合唱《今宵多珍重》，雪姐笑指：「修哥去邊都gel行個頭，落街食早餐都着西裝。」其中一part雪姐着魚網裙跳Rosé、Bruno Mars嘅《APT.》掀高潮，佢大方話只要靚而高雅就唔介意性感。
到羅家英現身時，重提偷咗太太汪明荃首飾櫃中最唔起眼嗰支髮釵送俾雪姐，自稱「家賊」，笑C！主持阮兆祥笑問家英哥最近有冇揼骨？家英哥大方話：「慢慢同你傾。」隨後雪姐孖楊盼盼齊打大鑼鼓，tag家英哥唱《男兒當自強》，已屆79歲嘅家英哥中氣十足，仲不斷大叫著全場觀眾一齊嗌添，勁！
到黃日華出場時，佢笑稱係眾嘉賓中年紀最細。其後雪梨帶同仔女徐偉棟、徐穎堃上台唱 《真的愛你》撐家姐。之後雪姐獨唱《每當變幻時》，螢幕出現同已故男友尹志強合照，尹佬離世16年，可見雪姐依然情深，令人不勝唏噓。壓軸出場有71歲仍保養得十分好嘅趙雅芝，兩位美魔女真係好似首飾箱咁靚呀！想睇呢場咁有愛嘅party，入嚟睇片吧！
