【Viu】米雪即將喺6月中舉行首個個唱《友你有米55派對騷》，今日宣布加開多一場，除咗有3位老best羅家英、羅霖、白彪人到又禮到之外，仲獲一眾圈中好友包括：何家勁、任達華、艾迪、謝霆鋒、佘詩曼、容祖兒、鍾嘉欣、衛詩雅、關智斌等拍片送祝福，相識滿天下，人緣真係好呀！
家英哥透露會同米雪姐合唱《紫釵記》，所以偷咗汪阿姐嘅私伙金釵送畀米雪，畀阿姐知道會唔會扭耳仔㗎？點知家英哥開玩笑自爆成日偷嘢送禮，仲送咗畀邊個女仔？米雪話到時會同髮型師夾夾，盡量用到支金釵！家英哥再爆喺近30年嚟屋企被爆格3次，啲小偷每次都係趁工人出去放狗嗰15分鐘take action，被偷嘅鑽石、手錶等合共五、六百萬，所以佢搞爛gag笑言依家買嘅嘢都係假，屋企亦唔會擺真嘢！
對又誤傳汪阿姐死訊，家英哥話唔覺阿姐有唔開心，又指呢個係個人嘅口孽！米雪續話做呢行係百無禁忌，農曆新年拍劇都照瞓棺材！另外，家英哥透露競選八和會館主席背後原因，更揚言短命幾年都會做，擔唔擔心影響身體健康？先去睇足本訪問！
