【Viu】舞台劇《The Magic Hour 魔幻時刻》今晚喺演藝學院舉行頭場，一眾主演謝君豪、葛民輝、AK@MIRROR、Rosa韋羅莎、童童@小薯茄、魯文傑，齊齊現身拜神儀式，之後就緊接進行總綵排，更有學生欣賞，難怪佢哋話有啲緊張！
豪哥透露今次演出有唔少動作戲，其中有場跑戲跑到大髀都酸痛！之後講到恩師King Sir鍾景輝睡夢中離世，豪哥就悲從中來，眼紅紅談恩師對佢嘅教誨，銘記對方講過嘅金句，形容對方係一位好值得尊敬嘅老師，甚至係戲劇、影視界嘅開拓者，希望King Sir安息。
豪哥又謂當日收到噩耗咁啱係身在演藝學院，正正係佢同King Sir合作首個舞台劇之地，更揚言冇King Sir就冇演藝學院，所以完全畀唔到反應、百感交集，更以為係假消息。雙方對一上次見面就係一齊慶祝生日，豪哥指每次見面講到戲劇方面，King Sir就會寧舍生猛！豪哥特別話當King Sir知佢攞劇帝係好開心，唯一憾事就係履行唔到雙方嘅最後一個約定，就係一齊再食飯。
另外，阿葛率先劇透舞台劇有大量爆破場口，又爆AK、童童有情慾戲，最後再自爆為「收買」導演加場同「情婦」Rosa嘅攬戲，不惜私下塞咗封老毛，但轉頭問返另一當事人Rosa，佢就極力否認有件咁嘅事，呢單嘢演變成羅生門？
童童憶述返阿葛請食滋味羊腩煲，被笑由頭jap到尾，已經諗定完騷再去邊到食大餐，段訪問後part變成飲食訪談咁款，真係畀佢哋3個笑死！咁唔知AK幾時亮相《8點直樂 VIURIETY》騷吓廚技？先睇足本訪問！
