【Viu】謝君豪 、葛民輝、Rosa韋羅莎、AK江𤒹生、魯文傑及童童將合作演出舞台劇《The Magic Hour 魔幻時刻》，今日出席記者會大放笑彈，直頭係未排戲先興奮呀！
《SUCK樂園》班底AK、童童、Rosa再聚，佢哋開心話感覺更熟悉，Rosa上次同AK屬師生關係，但今次就展開咗一條感情線，劇情講述AK搭上果欄黑幫大佬阿葛嘅情人Rosa！Rosa姨母笑話當初一聽到同AK有感情線就唔睇劇本即接，比起之前同楊偉倫係一對，今次更有「鮮」味，直情想即刻就排戲咁話！AK爆料指同Rosa有好close嘅身體接觸，去到「碰撞」嘅level，咁激？難怪Rosa話驚收刀片啦！
驚收刀片嘅仲有童童，事關舞台劇係改編自三谷幸喜同名電影，而童童嘅角色就係日本女神綾瀨遙飾演，童童笑言驚變成「綾曉童」收刀片咁話！童童同Rosa不約而同話呢次係抱住追星心態嚟開工，佢哋各自係追邊個？三位又接唔接得住阿葛咁hyper？
AK謙稱仲係舞台劇界嘅新丁，所以都仲係有少少壓力，會唔會叫MIRROR班兄弟嚟睇騷？嚟緊MIRO fans meeting會follow大表哥嘅泰式送花法？
阿葛喺記者會率先大爆「英式英文」，經「翻譯」過後完全冇粗口感覺，確實係文人呀！到時on show會唔會有更多？豪哥則笑言自己比較中化，係「中式中文」較多！演殺手嘅豪哥會有大量動作戲？演經理人嘅魯文傑跟住豪哥都要習武？
訪問去到最後，阿葛同豪哥變大暴走，豪哥直言對住阿葛腎上腺素上頭頂，high到爆！佢哋又喪話當年，呢段「識於微時」嘅關係究竟係點？另外，豪哥、Rosa分別獲提名劇帝、劇后，佢哋有冇信心攞獎？睇足本訪問啦！
