【Viu】「腦細」林日曦嘅年度癲喪舞台劇《大死撐日》，今日孖埋毛舜筠、「阿卵」楊偉倫出席記者會，宣布暫定演出37場，不過以腦細慣例，大賣關子話係有加場嘅空間嘅！講到搵嚟毛姐參演，腦細話係密謀咗好耐㗎啦，至於搵阿卵，佢就沾沾話早過子華神欽點佢，之但係係「欽」定係「陰」，阿卵就話有啲保留啦！唔知「母子檔」毛姐、阿卵再次合體又擦出啲咩火花？
話說腦細一直以嚟嘅做法都係喺圍讀前先畀劇本演員，但呢日毛姐自爆已睇劇本，殺腦細一個措手不及，點解腦細會有呢個破天荒舉動？咩都唔知嘅阿卵又有咩反應？腦細又爆到時會唱幾首粵曲，全部都係由自己創作㗎，同樣地都係得毛姐率先聽過，毛姐笑評聽到腦細清唱粵曲難接受呀，笑死！然後佢又指曾激嬲腦細，究竟係發生咩事？
毛姐成功令腦細破例攞劇本出嚟，腦細亦成功說掂毛姐演埋日場，當中係點bargain㗎呢？繼腦細之前演《大反枱日》嗰陣，有家長觀眾用膠袋幫小朋友屙尿，再到最近有觀眾睇《關於那隻龜回魂的故事》打交，腦細表示今次會加大力度同觀眾講要遵守劇場規則，若有違規劇場有權要求觀眾離場！
到時舞台劇影大合照環節，會唔會再延續「Coldplay事件」，保護返需要受保護嘅觀眾？上次有冇觀眾send email要求保護？另外，老友田蕊妮癌症復發，腦細指有send過message慰問對方，相信其老公有照顧好阿田！
