【viu】汪明荃相隔7年，將於11月舉行兩場紅館演唱會，今日記者會上首度播放由林家謙作曲、黃偉文填詞嘅新歌《Make My Day》，歌曲節奏輕快，羅家英即興上台融合粵劇舞步，雖然主持鄭丹瑞叫阿姐三思係咪要邀請家英哥做嘉賓，但阿姐反而覺得幾好：「唔緊要，只要開心就得喇！」並預告呢首歌將會係演唱會last song，等大家一齊開心一下。
香港市道麻麻，阿姐直言未諗加場，先專心做好呢兩場。77歲嘅阿姐亦擔心年紀越嚟越大，唔知做唔做得返50年前咁好，但承諾一定會盡力演出。講到經典《熱咖啡》，歌衫會唔會有突破？阿姐笑問：「你意思少布？」身旁家英哥搶答：「唔好啦啩！」夫妻互動超爆笑，家英哥直言為助阿姐宣傳，先會窒下阿姐，仲爆兩人喺屋企點相處。
阿姐喺台上兩度將「家謙」講錯做「家熹」，原來阿姐同家謙到依家都未正式見過面，但知道對方好受歡迎，作曲又好聽，所以邀請家謙合作，對方答應後，再搵欠阿姐一首歌嘅Wyman填詞，真係超夢幻組合呀！想知阿姐點應對「喃嘸佬」唱腔？又會唔會邀請家謙做演唱會嘉賓？仲有提到欣宜忽然被傳秘密生仔一事，咁豐富內容，記得要睇足本訪問呀。
