【Viu】《GRASSHOPPER THREE IN LOVE草蜢演唱會2026》今晚去到第五場喇！蔡一傑喺台上分享前年對抗腦腫瘤嘅經歷，傑仔指自己接受完腫瘤切除手術後做咗8次電療，佢憶述：「第一次做電療時，可以播音樂紓緩（情緒），但邊鬼度紓緩到，冇用。Laser個感覺係割落你個頭殼，成個感覺係好恐怖。長達一個鐘頭，要瞓喺度唔准郁。第二次，我就醒目，大家都知我係DJ，我就播晒電音，去過渡嗰一個鐘頭。」
傑仔感性表示：「當大家遇到一啲唔係好順心時，自己要識去自己調節自己，就好似擊球手打棒球打出去，接球嗰個要識卸力，要用手套卸力。我希望大家可以做到呢一個手套，可以柔韌自如、識去relax同走位，收唔收到我想講咩？」全場樂迷大叫收到！
嘉賓環節，軟硬天師登場，林海峰、葛民輝以肥仔look現身，阿智就向愛運動嘅林海峰送上泳褲，阿葛就收到孖煙囪，相當搞笑！軟硬唱草蜢嘅《三分鐘放縱》，仲鬼馬改詞，氣氛相當好！傑仔笑指二人冇跳過舞，阿智就形容係「落地生根舞」，林海峰回應話：「你哋係跳舞組合，我哋係冇跳組合。」笑C！草蜢就唱返軟硬嘅《叱吒勁歌金曲》。
林海峰又喺台上憶起睇《三分鐘放縱》MV就覺得草蜢嘅滑板look好型，之後阿葛就去搵類似嘅打扮。林海峰再話多謝草蜢令《廣播道Fans殺人事件》MV嘅造型有加分，「如果草蜢任何時間要同軟硬對戰，我哋隨時都會即刻到！」草蜢、軟硬亦有合唱《朋友》、《好兄弟》，正啊，入嚟睇片喇！
