【Viu】《GRASSHOPPER THREE IN LOVE 草蜢演唱會2026》噚晚第二場繼續炸爆紅館！蔡一傑獨唱《失樂園》後，特別公開感謝一位前輩喺自己患病期間送暖：「佢隔四、五日就會打電話嚟問我：『點樣呀？你情況如何？身體好嗎？有冇覺得咩唔舒服？』又短訊我，天氣轉變又會話：『傑仔，呢個時節乍暖還寒，你要多加注意，着多件衫呀！』好溫暖。呢位係胡楓先生，修哥。」傑仔又表示前年爸爸離世，修哥當佢仔咁錫，so sweet！
Encore環節，表演嘉賓係Kelly陳慧琳，女神笑稱：「我細個就聽你哋啲歌！我終於可以講呢句說話啦！」又坦言求學時期偶爾偷聽收音機唔溫書，一聽草蜢冧歌就「少女情懷總是詩」，更爆埋當年睡房貼滿草蜢海報。傑仔又直指曾經好嬲張學友：「因為Kelly初出道幫學友拍咗個音樂特輯，我哋又冇特輯拍，睇到佢哋嘅特輯鬼死咁靚，去咗LA，仲要同個咁靚嘅靚女一齊，總之就好鬼妒忌張學友！」
其後蔡一智大癲送傑仔嘅人形攬枕俾Kelly，蘇志威就攞印咗佢同阿智靚仔樣嘅小咕𠱸：「因為我哋兩個結咗婚唔可以俾你攬，只可以俾你枕，或者坐上去。」完騷後經理人鍾珍拍低Kelly對傑仔攬枕愛不釋手，但佢都「理智」地關顧老公感受：「攞返屋企有人會嬲㗎喎！攬住瞓唔得㗎喎！」笑C！
