【Viu】姜濤4月30日就迎來 27歲，姜濤香港後援會今年繼續為偶像預備應援活動 ，其中一項係由今日開始一連7日將會喺啟德體育園舉行「Keung's Family慈善動畫及姜濤相片展覽」。
小編為大家實地直擊下先，活動分3大亮點，Part 1 相片展區分別展示姜濤為後援會獨家影嘅多張靚仔相；又有首度公開嘅珍貴舊相放題，見證8年嚟姜濤同後援會一齊成長嘅畫面。姜admin更借出今年1月1日喺「叱咤」攞到嘅「我最喜愛的男歌手」同「我最喜愛的歌曲」兩個獎展出。當然仲有佢親手撰寫嘅「家書」：「我們的關係就像超人與太陽，每當我受了傷失去力量，你們就像那顆太陽，時刻照耀着我，幫我恢復力量，而我也會時刻提醒自己，不能走歪路，不能辜負你們，我會好好守護心底的那份正義與善良。」
Part 2係動畫區，今年後援會極具心思，等大家可以走入由「小姜姜」、「小濤濤」同姜糖s編織嘅夢幻世界。動畫神還原咗幾個場景，包括有姜家客廳、「姜濤灣」火鍋店、姜濤入行前兼職嘅快餐店等。而最好笑嘅莫過於係黃牛基地，寓意姜admin每次開騷都成黃牛搶飛目標。
而Part 3嘅Pop-up store亦發售多款「小姜姜」、「小濤濤」嘅限量週邊，所有收益扣除成本後會全數捐出作慈善用途，巧有愛！ 快啲睇片啦！
