【Viu】「走囉！」由Will柯煒林主演嘅台灣電影《大濛》終於由走到嚟香港，Will為咗演好喺民國43年生活嘅外省車伕趙公道，壓力好大，雖然憑角色提名金馬影帝，但Will就自責演出未臻完善，尤其係廣東話部份始終未夠年代感，好驚被香港觀眾「拆穿」呀！
呢份壓力，其實係源自Will深受陳玉勳導演嘅劇本感動，唔想辜負「趙公道」呢個大時代下嘅小人物，仲話如果依家再演趙公道，一定會更有「生活感」！事關Will喺呢半年經歷患病，生命中嘅風景有所改變，同時亦體驗到生命之光，成為咗「柯煒林2.78」，想了解心態不一樣但堅持依舊嘅Will，呢個專訪不容錯過！
