【Viu】MIRROR官方歌迷會主辦嘅《Hi MIRO! Garden Party 2026》噚日舉行兩場，下午場由Stanley邱士縉打頭陣，曾經喺活動豪言要灑聖水嘅大表哥，是日化身「找數真漢子」，手執碌柚葉行匀全場「灑甘露」，搞笑指要幫大家清洗罪孽，全場Team Stanley亦識做高呼：「我有罪！」仲不斷爭取更多甘露，務求「濕晒」為止，場面搞笑又熱鬧！
其後Stanley送上林宥嘉嘅歌曲《壞與更壞》鼓勵Fans，仲走入觀眾席大派福利，不但送上「愛的抱抱」，仲應要求化身「菲律賓老公」，即場演繹菲律賓夫婦嘅Facetime對話，SLDPK呀！Stanley再唱出《後台》感謝Fans無限嘅愛，送埋4份心思禮物添，當遇上同隊長Lokman同名嘅Fans仲即刻變得恭敬！見面會當然唔少得深情剖白環節，Stanley同Team Stanley互訴心聲，最後一眾MIRO仲齊齊拉花炮回敬Stanley的甘露，超有愛呀！
晚上場次由Jer柳應廷接力，以《不要活成自己討厭的模樣》揭開序幕，其後Jer亦大派福利，仲應要求露出手臂，大晒健身成果。期間有遠道從瑞士嚟香港嘅「柳柳粉」許願Jer將來可以去歐美開Tour；Jer亦即興同Fans大合唱《人類群星閃耀時》，最後帶領全場MIRO齊齊掟紙飛機許願，兼且打破麥花臣紀錄，寵粉寵到凌晨1點幾先完場！
此外，Lokman楊樂文搞笑用自拍福利交換「頭巾兵團」拎住嘅黎明演唱會「紅蘿蔔」手燈，Lokman 仲以一句：「多謝黎明！」作結， Funny！其後Lokman同Fans展望將來，原來隊長想開設一間「Johnny 事務所」培育後輩，成為「港版瀧澤秀明」，仲同全場MIRO齊齊集氣可以開《W.T.F. LIVE》3.0，期待Max！
