今晚係Tiger@MIRROR喺麥花臣舉行首個個人演唱會《麥花臣節X Tiger Yau “Where It Begins” Live 2026》嘅大日子！MIRROR 7位哥哥現身撐爆虎仔，由隊長Lokman帶頭由後台行出，緊隨其後嘅有Alton、Frankie、Ian、Jeremy、Stanley，副隊長AK就負責守尾門，呢單嘢仲唔係因為愛？
着住皮褸配白背心嘅虎仔chok爆登場，一嚟就叫小虎隊做Baby，咁冧豬叫小虎隊今晚點瞓？呢晚Tiger cover咗好多經典金曲，搖身一變變咗做Cantopop disco之夜！喺唱《一生也愛你一個》嗰陣，Tiger搵嚟《存酒人》嘅「阿雪」Ocean安柔潔演出，對唱至最後面對面貼額頭！
23歲嘅「小虎妹」Kelly呢晚除咗做琴手之外，更同「虎哥」Tiger以鋼琴合唱《Fields of Gold》，屬佢哋首次同台演出！邱氏兄妹都係人靚聲甜，超正呀！虎仔更係不時望住妹妹甜笑，又讚妹妹好叻，「寵妹狂魔」嘅一面爆發晒出嚟，至於虎妹一唱完就激動爆喊！
喺跟住落嚟嗰part，虎仔去到台後嘅小舞台位置，同師父兼音樂總監天衡結他battle，鬥到難分難解呀，仲唔係嚴師出高徒？之後虎仔首唱新歌《脫兔》，呢位脫兔唱完即脫，脫淨件白色背心too hot to handle！
Cantopop disco之夜又點會咁快完？Tiger揚言最正但最攰嘅一part嚟啦！就係帶嚟一連串Rock版金曲，先嚟《將冰山劈開》、《相對濕度》，唱到件白背心都濕晒啦，一齊同Tiger唱爆麥花臣啦喂！
