【Viu】Yoga林宥嘉 x Jer柳應廷喺啟德體藝館開唱第二場亦係尾場！呢晚嚟睇騷嘅除咗有COLLAR嘅芯駖同Winka、TELLER、Jacky Fan，仲有行路趷下趷下嘅Alfred許廷鏗，佢自爆噚日打Pickleball整傷右腳，疑似有條筋撕裂添，take care呀！
騷上當Yoga唱《說謊》前，佢話嚟香港開騷真係好幸福，因為成個T台都充滿住礦泉水，呢個原因會唔會太cute？佢仲諗到條橋想整蠱其他歌手添！Yoga更清唱咗幾句Janice嘅《她整晚在寫信》送畀指定嘅fans！而喺唱《說謊》嗰陣，大螢幕播出Yoga之前嘅演出片段，最後仲同fans大合唱添！嚟到尾場嘅Yoga變開籠雀分享勁多小事情，包括話自己每日都會練唱歌，甚至同屋企人去日本旅行都要走去戶外嘅垃圾場凍住練歌，respect！
Jer搵嚟老best吳林峰用結他jam咗首《大雄》，呢晚佢哋都超high，圓夢同側田合唱《KONG》、《運》，因為佢哋都話中學嗰陣係用側田嘅歌嚟比賽，特別係吳林峰呢晚係嚟雪恥㗎！
去到後半part，Jer送咗個超大surprise畀柳炒！就係唱咗尾場限定《狂人日記》 、《人類群星閃耀時》 ，全場柳炒明顯勁hyper！當然Jer都依然有唱Day 1嘅《今繼》 啦！之後再輪到Yoga帶嚟《壞與更壞》 同《想自由》 ，期間佢透露喺籌備個唱期間，Jer超級用心，又話同側田、吳林峰合作勁正！
最後四位新組嘅「My Husband」合唱《男人KTV》作結！但臨走前My Husband意猶未盡，自動波encore，清唱咗一小節《命硬》！啲歌咁正，仲唔快啲睇實況聽歌？
