【Viu】《賈思樂 Happy Together Again 2026 in concert》今晚喺灣仔伊館舉行，Louie賈思樂以《One Night Only》揭開序幕，仲解釋「One Night Only」嘅意思係因為今晚會唱盡自己最鍾意嘅英文歌，而且門票收入將撥捐大埔火災災民，其後再送上Bee Gees組曲，聽出耳油！
三哥苗僑偉孖三嫂戚美珍、黃日華、向海嵐、羅霖、陳法蓉等專誠捧場，三哥同華哥直言那些年嘅賈翁唔止係「少女殺手」，連少男都電暈，又笑認因為唔識英文而唔敢上台獻醜，但歌癮大起嘅華哥就即席唱飲歌，搞到三哥話心思思想贊助華哥開騷，笑爆全場！講到古天樂再出碟，三哥話一定會入手支持，但會畀單古生Claim錢；華哥聞言即爆阿女抽《尋秦記》卡抽唔中三哥，陰功豬呀！
此外，向海嵐講返情人節約陳妙瑛聚舊嘅趣事，原來「大妹」同「二妹」傾足三粒鐘，仲話自己係咁勸對方復出幕前，想知《無頭東宮》有冇機會合體就睇足本訪問啦！
