【Viu】謝寧嘅曲奇餅店今日新舖開張，邀得第一套劇嘅「男朋友」苗僑偉（三哥）同第二套劇嘅「老公」黃日華撐場，全程不斷被兩位老友整蠱，搞到謝寧啲少女心飛晒出嚟，勁Cute囉！
謝寧話今次逆巿擴張投資7位數，希望將蝴蝶酥成為香港手信，最多謝「大客仔」三哥同華哥經常幫襯，不過兩位型男就話冇份入股，事關投資者已經排到長沙灣喇！
三位「楊家將」難得同場，梗係要話當年啦，謝寧笑指當年經常畀兩位蝦，所以「棄影從餅」；華哥即爆Seed話同佢演對手戲好似對住碌木咁，笑爆全場！
講到三哥、華哥同「三嫂」戚美珍喺盧海鵬演唱會上開金口，三嫂嘅歌藝仲震懾一班年輕網友，三哥就話三嫂不嬲唱得，仲曾經有人想叫三嫂開演唱會㗎，但太太婉拒咗，又再三澄清自己冇收埋三嫂，不知幾想「踢」老婆出嚟做嘢，自己專心打波咁話！而華哥就話冇因為同關寶慧傳緋聞而受困擾，清者自清，目前最享受踢波，冇乜戲癮喇！
此外，想知三哥有冇抽《尋秦記》卡？幾時同古天樂合唱《天命最高》？睇足本訪問就知啦！
