【Viu】啱啱過94歲生日嘅「修哥」胡楓，今晚西裝骨骨現身晚宴，賀「保險女王」Agassi王玉環創下世界紀錄，獲認證為「保險業晉升至最高職位的女歌星」！問到壽星仔修修生日願望，佢就話梗係身體健康啦！
李司棋同黃德斌今日出席活動，分享合作拍攝以退休為題嘅微電影趣事，德斌笑言當年重返公仔箱第一套劇就係97年同司棋姐合作《真情》，估唔到眨吓眼就要合作退休微電影，笑爆全場！司棋姐憶述當年覺得德斌怕醜又寡言，同關海山（蝦叔）一班前輩成日𥄫住佢做戲，擔心佢演得唔好，點知德斌表現超好。德斌就話當年見到司棋姐同蝦叔勁淆底，只敢坐埋一二邊，但大讚司棋姐係說話直截了當嘅好前輩。
笑指司棋姐今次喺微電影嘅造型冇「招牌黑絲Look」，德斌會唔會失望呢？點知司棋姐即刻伸出美腿話自己隨時Ready著黑絲㗎，超玩得！不過，司棋姐就坦言冇戲癮，唔會再拍劇，反而心思思搞餐車，仲相約德斌齊齊開檔添！
