【Viu】李司棋今日孖Ivy So@COLLAR現身防騙教育展，大談險被騙經歷，好彩兩位醒目女未有受騙，仲開心share防騙心得！活動期間同「ViuTV一哥」Dee哥@ERROR電話連線，Dee哥聲稱被姓朴嘅導演睇中做孔劉接班人，去咗泰國拍戲，莫非畀人呃咗去「KK園」？究竟發生咩事？
事後Ivy So自爆最近同Day去韓國上跳舞堂嗰陣被Oppa搭訕，仲還原事發經過就係佢一個人喺弘大街頭被「抄牌」，Ivy So覺得好唐突又有啲驚，嚟唔切仔細睇Oppa個端莊靚樣就閃走咗啦！佢又指呢次快閃咁啱可以會合埋Marf，一齊去食美味烤腸，但因為要keep住副靚body，冇得大吃大喝！
近日Ivy So被傳同「院長」洪嘉豪撻着，女神呢日回應就話睇到報道嗰陣好錯愕，至於係堅定流？佢直言已經出咗story啦，48個「NO」，否認同院長拍拖！Ivy So笑指見到網民起勢搵唔同「證據」，包括《困獸鬥》嘅一條片，覺得好搞笑，澄清同院長嘅關係只限係《Last Seen!》同事、普通朋友，不過佢都讚院長份人幽默、風趣、唱歌又好聽，呢啲又係咪女神嘅揀偶條件呢？經理人戴穎又畀唔畀拍拖？Ivy So仲笑話COLLAR班姊妹對佢傳緋聞零八卦，想求關注呀！
司棋姐就再次「大契」上身爆《溏心風暴》金句，連佢自己都話回憶返晒嚟！活躍IG嘅佢自爆起初曾收到唔少詐騙DM，朋友都有提醒佢唔好覆，但都估唔到有次收到一個WeChat電話，對方噏得出佢嘅身份證number，仲話司棋姐買咗幾百萬器材，都咪話唔驚呀！最後司棋姐點反擊？近排唔少內地演員被拐騙去「KK園」，司棋姐以前登台亦有被帶去偏遠地方？想知就睇足本訪問啦！
