【Viu】《全民造星VI》11強記者會今日喺將軍澳舉行，席間宣布63號Teller喺網上獲得最高票數，成為「第11強」！Teller可以躋身總決賽當然高興，但認同自己只得一星期時間準備有啲輸蝕，希望以最擅長嘅Beatbox炸台。至於73號Yip Sir因為以40歲之齡入10強而引起網友熱議，佢坦言有因為負評而唔開心，多得女友陳葦璇做心理建設，仲笑言唔介意做男團，甚至湊男團，幫助好似6號Gordon咁嘅後生靚仔，好睇得開喎！
另一邊廂，5號Kirs、12號小雞、34號丘藍同41號Jacky Fan除咗唱得外，「毒舌」同樣厲害，暴走互Mean超爆笑！Jacky自爆最傷心係畀花姐話「老屎忽」，所以今日覆啅入99強嘅歌《MM7》，力證自己仍然「鮮嫩」，仲話獲偶像張敬軒DM鼓勵，開心到爆；丘藍則獲好友MC同希晉讚叻仔！想了解11強更多就睇足本訪問啦！
