【Viu】Gin Lee李幸倪今晚擔任美國嘻哈電音天團Black Eyed Peas西九騷嘅暖場嘉賓！Gin勁hyper咁話大學時期成日聽Black Eyed Peas嘅歌，所以今次可以擔任暖場好開心，仲趁上台前有同偶像自肥傾偈，至於集郵就係必須的！
Gin除咗帶嚟勁歌熱舞嘅演出，臨離開舞台前更宣布明年2月再登紅館好消息，公布埋個唱poster添！見Gin上身淨係得銀色bra，sexy到爆！佢謙稱係造型師功勞，笑話睇到件衫當下有尖叫，對poster露事業線，Gin幽默大笑冇攝嘢：「堅㗎！一向sell真嘢！」到時紅館騷再sell啲堅嘢出嚟？
不過Gin就話今次唔會叫屋企人上台啦，咁唔知佢會唔會搵《造星VI》班仔仔呢？雖然呢幾日都要準備今晚個演出，但Gin笑話有忍唔住追返節目嚟睇，仲預告之後會更精彩！
B4組搵嚟Cousin Fung加持，Gin揚言呢次堅係碌盡人情牌，破咗佢個「不求人」人設，嚟緊仲有肥仔、少爺占等出手相助！Gin又笑話喺往後嘅集數會變得嚴厲、再爆更多金句，希望觀眾睇完唔好唔記得佢可愛嘅一面！佢亦話好開心拍完《造星VI》，畀佢更放心做自己！
另外，叱咤喺今日晏晝公布「我最喜愛」嘅8強走勢，堅到爆嘅Gin繼續佔一席位，佢呼籲大家投佢一票，更即場立flag，若然成功打入「我最喜愛的女歌手」，佢會做一件事！想知Gin立咗咩flag？咁就要睇足本訪問啦！
