【Viu】Jeffrey魏浚笙、「世一」Ryan蔡俊彥、「Ca姐」陳苡臻、Cloud雲浩影同Nancy歸綽嶢今日出席化妝品活動，日前喺《叱咤》記者會化身「葡提老祖」突圍而出嘅Jeffrey，笑指被網友追問身上有幾多粒提子，仲話有意拍片「數提子」畀大家驗明正身，期待Max！講到同Ryan同場，Jeffrey即誠邀「世一」加入《膠戰》Family，仲放風話想拍《膠戰S5》，最好每個國家拍一集，首站係「德國肥腸」，有諗法喎！
對於好友張敬軒開Live時透露唔想再被稱為軒公，Jeffrey就話未收到柯打要改口，如有需要可以叫「軒記」，今日轉數幾快喎！
至於Ryan搞笑話「𦧲飯應」答應Jeffrey嘅邀約，但如果係「老Best」Edan邀請就要諗諗，又自嘲「膠吓膠吓」，驚拍節目全阻人收工。不過，Ryan直言對唱歌有興趣，仲爆Edan Hea自己，根本冇聽自己send畀佢嘅唱歌錄音，所以綵排演唱會時先會嚇親！至於被Jeffrey封為「港版蕭敬騰」，Ryan就謙稱除咗大家都係男人，自己就唔敢同前輩比較喇！
此外，Ca姐透露早前被狗咬傷要縫13針，估計會留痕，陰功豬呀！佢又話好開心可以喺古天樂生日會同老闆合唱《男朋友》，仲教大家點樣令Mr. Cool派心添，想知就睇足本訪問啦！
