【Viu】樂壇又有新勢力加入！鄭子誠、王敏德、Justin張建聲、Sammy沈震軒組「四大惡人」宣布進軍香港樂壇，今日舉行出道作《騙徒不勝》發布會兼首個fans meeting，現場氣氛高漲！四子喺大熱天時仍然full gear上陣，唱到大汗疊細汗咁，成件事勁熱血呀！
佢哋唔止要搞街市tour，更決意橫掃明年各樂壇頒獎禮嘅新人獎，搞笑向現今嘅男、女子組合嚟個下馬威，真係畀佢哋笑死！見到呢日係Thor駱振偉做主持，四子遂即自薦上Chill Club！Justin笑指雖然佢哋個樣係惡少少，但絕對係心地善良㗎！之後佢哋又分別自稱係亂噏擔當、義氣擔當、聲線擔當、打雜擔當，估唔估到係邊個打邊個？
早前南京偽娘「紅姐」紅透半邊天，其中「來都來了哥」Mike被指激似Sammy，故有「翻版沈震軒」之稱！Sammy即場演繹金句「來都來了」，笑到Justin彎晒腰！佢指當日有勁多人send message畀佢，唔知佢自己覺得似唔似？女朋友Shirley又有冇comment？
另外，Justin日前公開醫生紙，自爆同時患上廣泛性抑鬱症、焦慮症、人格解離症3種情緒病，呢日佢回應指好返好多啦，但現階段都係要繼續食藥，又坦言之前曾因病情影響工作！而年頭與細16歲工展小姐曾嘉晴分手後，佢嘅感情生活又如何？想知就即刻睇足本訪問啦！
