【Viu】劉德華之前一直忙於巡迴演唱會，未參與電影《焚城》宣傳，完成台北站演唱會後，佢噚日就忽然現身戲院同一眾演員一齊謝票！演員們同觀眾本身都唔知華仔會出現，直至佢喺觀眾席舉手發問，大家先發現，相當驚喜！華仔跑到台前同大家擁抱，Michael王敏德戲中角色上身，同華仔講：「Are you losing your mind?」華仔用戲中對白回應：「你玩完啦」，好精彩！
華仔有感而發：「多謝你哋支持香港電影及我哋一班新嘅演員，佢哋就係我哋香港電影嘅未來！」華仔同一班年輕演員一齊演出嘅場口有限，並從劇組人員得知佢哋由練習到拍攝時嘅經歷，佢話：「知道你哋嘅努力，非常好！你係我哋嘅未來！」
華仔忠粉阿Dee分享：「第一日開工劉生已經嚟探班，直至我殺青嗰日，佢仲特登嚟送花俾farewell ，自己都好感動，其實我到而家見到劉生都好緊張，大家應該睇得出我有啲心慌意亂，我唔知自己講啲乜，好開心、好夢幻。我感受到前輩們好用心去做好香港電影，同埋知道想搵機會提攜我哋，俾好多機會我哋，好多謝劉生，希望我哋可以繼續努力，唔會令你失望。」
阿炳梁仲恆覺得劉生好隨和、好Nice，Michael插嘴：「我覺得唔係好Nice嘅，（喺戲中）成日鬧我，不過佢話下次有機會搵我同Michael（周文健）一齊拍喜劇，仲可以英文對白！」Locker馬上自薦話自己都希望同華仔拍喜劇！華仔表示無任歡迎，並大爆Locker腳傷仍繼續開工，讚佢好敬業！
之後，阿Dee問華仔會唔會再有機會同佢一齊謝票，華仔秒回：「你安排，我聽！」，阿Dee就約定大家13號謝票場見！《焚城》團隊相當團結，阿
Dee、Jeffrey魏浚笙、王丹妮、Locker同監製、導演之前出席千人聯校座談會、玩排球友誼賽，期待佢哋之後有咩搞作！
