【Viu】Sammi鄭秀文今日型爆現身《第三十一屆香港電影評論學會大獎頒獎典禮》，頒發「最佳導演」、「最佳編劇」、「最佳男演員」、「最佳女演員」同「最佳電影」五大獎項。Sammi喺台上回顧同「電影評論學會」嘅緣份，除咗2023年憑《流水落花》奪得「最佳女演員」外，其實Sammi嘅首個影后獎項亦係嚟自呢個頒獎禮，正正係2002年憑《鍾無艷》「開齋」得獎，意義非凡！當佢聽到老拍檔劉青雲憑《爸爸》五奪「最佳男演員」後，即高呼要向「前輩」學習，向「五奪」之路進發！
其後當Sammi頒發「最佳編劇」畀《臨時刧案》嘅麥啟光、陳偉斌同萬芫澄時，仲上演咗一場「Fans奇遇記」，事緣萬編劇發表感言時自認係「追星天花板」，皆因8歲時就係因為睇咗Sammi同杜琪峯合作嘅電影而想投身電影界，Sammi聞言即攬攬Fans以示鼓勵，場面感人！
