【Viu】Sammi鄭秀文嘅澳門演唱會噚晚去到第6場，請到Kary吳雨霏做嘉賓，勁驚喜！Sammi同Kary合唱《愛是最大權利》後攬到實一實，Sammi話：「Kary其實今日把聲有啲唔舒服，但佢話唔怕，有你哋支持，會繼續唱好呢首歌！」Kary向觀眾揮手打招呼：「好耐冇見大家，大家好嗎？我係吳雨霏。」Sammi喺台上鼓勵Kary復出：「你唔好成日掛住湊仔，幾時返出嚟唱歌？（我依家咪出咗嚟囉！）哈哈，係咪即係從此出嚟先？要問吓老公同仔女？（問吓佢哋先啦！）」
Sammi表示同Kary私下係好姊妹，經常聯絡問候近況！Kary話：「Sammi真係好好，雖然第一次唱歌做嘢，但私底下成日message我、問候我、鼓勵我。所以我要多謝你，你真係一位好好嘅朋友同埋前輩。」Sammi回應：「我哋都係主內嘅姊妹，感謝、讚美主！」
喺Sammi落台換衫嘅時候，Kary喺台上同觀眾講：「今日發生咗小插曲，就係失咗聲，但係唔緊要，嚟到見到大家，我只係想enjoy呢個舞台，因為我真係好耐無上台唱歌。原來我12年前喺呢個台開過個人演唱會，有啲樂手12年前都有幫我彈過，所以當Sammi邀請我時真係好興奮。你哋想聽咩歌？」台下起哄，Kary應觀眾要求唱出《我本人》，全場歡呼！
噚晚嘅歌迷超級熱情，完騷後唔肯散場大叫encore，寵粉嘅Sammi折返舞台清唱一段，多謝歌迷支持！
