【Viu】MIRROR噚晚兵分三路同大家一齊倒數，開心迎接2025年，十二子亦都分別分享2025年嘅新年願望！
喺澳門開騷嘅姜濤、Anson Lo、Edan同Jeremy，喺倒數前夕分享新年願望，Edan表示：「希望做多啲唔同嘅Job，出多啲自己寫嘅歌。」Anson Lo希望繼續做到work life balance，「可以繼續放鬆心情之餘，亦都可以繼續不停努力去衝，去工作。籌備緊今年第一隻跳唱歌 ，希望做好呢個project佢。」姜濤將願望送畀在場觀眾，佢話：「希望在場每一位將所有今年唔開心嘅嘢留低喺呢度，將我哋新嘅一年，新嘅心情，新嘅精神狀態，身體、心理上都可以健健康康，希望新一年大家都可以平安快樂。」Jeremy感性地指：「今年我都好幸福地做咗好多唔同嘅show，累積咗好多唔同嘅經驗，希望2025年我可以有機會將呢啲經驗show俾大家睇，亦都希望下年做多啲好嘅歌送俾大家！」
Ian、Jer、Stanley、Tiger現身尖沙咀倒數活動，Tiger分享新年願望：「係任何工作都無任歡迎，好好裝備自己，希望迎接新挑戰。」Ian表示：「希望自己都身體健康，另外希望巡唱順利。」抱病上陣嘅Jer希望大家身體健康、飲多啲暖水、著多啲衫，仲想自己有多啲工作、開多啲show！Stanley就話：「Crash Adams好欣賞我嘅rap，仲誠意邀請我同佢crossover，到時Ian、Jer同Tiger可以扮路人，因為佢哋會影一啲人拒絕咗佢哋先嘅，佢哋就做嗰啲，咁跟住我OK，就我嚟Rap，所以我要先學咗個rap先，另外當然希望拍電影，有咩都拍！」
出席沙田倒數活動Lokman、AK、Alton、Frankie興奮分享新年願望，Lokman話祝大家身體健康、繼續做自己想做嘅嘢、順順利利開開心心！Frankie認為身體健康、搵到自己鍾意做嘅嘢係最緊要！AK簡而精地話：「單純地好好運，恭喜大家。」Alton祝大家今年都有好多個第一次！
