【Viu】蔡一智@草蜢孖老婆今晚現身慈善晚會，受訪先替細佬蔡一傑感謝朋友、fans嘅關心同慰問，指傑仔依家正專注養病中，閒時會做吓運動、為草蜢明年40周年大project寫吓歌！
阿智透露傑仔都係臨出發美國巡唱前發現有腦癌，所以成件事都嚟得好突然，所有屋企人都好擔心！佢又指傑仔原本好堅持出發開騷，係經過大家說服後先去做手術！至於傑仔發現病前有冇啲咩病徵？知道病況嘅心情？之後有咩跟進療程？阿智謂就唔方便透露太多，可以留番傑仔好番出嚟見大家先再講！
工作方面，阿智指世巡淨番嘅5、6站會延期，唔想畀傑仔太大壓力，當事人雖然心急復出，但亦想以最佳狀態表演畀大家睇！出名貪靚嘅傑仔，腦部開刀後有條倒U、約長40cm嘅傷疤，問到會唔會唔開心？阿智鬼馬反問：「你話呢？」另外，18歲餅印細女出國留學，阿智又會唔會唔捨得？
同場Yumiko鄭希怡以敦煌天外飛仙look孖化妝師老公Andy現身，佢話呢身造型有令佢回想起以前拍MV嘅回憶！最近Yumiko以「瓊姐」之名重返樂壇，預告嚟緊會陸續出歌之外，又會拍戲，叫大家拭目以待咁話！
