【Viu】下個月將踏入50歲嘅吳忻熹（前名：吳文忻），早前突然自揭乳癌復發，已確診為第三期更擴散至淋巴，曾接受化療、免疫治療。今日係吳忻熹自公布病情後，跟9歲大女Scarlet、7歲細女Season，首度現身活動！三母女更齊齊行catwalk，見吳忻熹精神飽滿、中氣十足，老公陳劍陵都有嚟支持，係愛呀！
吳忻熹積極對抗病魔，近日決定棄化療，改上星期赴泰國曼谷進行「細胞治療」，費用約7位數字，治療過程係先抽取體內1億免疫細胞，以技術培植成222億免疫細胞，然後再打番入體內同癌細胞「打仗」，所以吳忻熹笑話佢依家嘅免疫力係高過現場嘅所有人！
佢感恩獲身邊好多朋友支持，向佢提供唔少治療方案！吳忻熹指細胞治療係新興醫療技術，暫未有副作用，亦都只係打一次針就可以，最開心係可以留返長頭髮！吳忻熹透露聽日會再獨自飛曼谷覆診，感覺似係去旅行心情輕鬆！Scarlet、Season更即場錫媽咪，真係超sweet！至於下個月就入「五」嘅吳忻熹，生日願望就係快啲好番！祝吳忻熹願望成真，生日快樂！
