【Viu】由ROVER四子、Elka@Lolly Talk、Sinnie@Lolly Talk、阿妺@Lolly Talk同陳伊霖等主演嘅舞台劇《重拾：10分鐘》今晚就公演，下午一眾台前幕後先進行拜神儀式，祈求演出順利！
一眾演員都表示心情興奮，ROVER話噚日full rehearsal大家都好enjoy，相信嚟真時會做得好好，希晉同Kim可能有啲緊張，臨演出前有啲咳，佢哋笑話有偶包所以要戴口罩示人，Kim坦言都擔心會影響個劇，因為中途會咳，所以keep 住食喉糖，希晉就食鹹竹蜂！講到日前綵排時，亨仔跣低即做掌上壓，執生能力OK喎，佢話因為要保持專業繼續演落去，又投訴其他隊友淨係顧住笑佢，希望到時候唔會有差池啦！
至於Elka就話噚晚緊張到瞓唔着，Sinnie靠自我催眠同自己講唔驚，阿妹就話會呃自己同綵排一樣啫，等自己無咁緊張喎，依霖以為自己唔緊張，點知病咗把聲爛咗，而家要想盡辦法開聲，Sinnie提議佢沖鹹竹蜂飲，又話自己係久病成醫，Elka噚日抽筋都係靠Sinnie按摩舒緩返！佢哋異口同聲笑話覺得亨仔係搞笑擔當，阿妹話綵排最尾係深情表白，亨仔成日對望鬥雞眼引人笑，警告佢到時唔好咁做呀，快啲睇足本訪問啦！
