【viu】Rosa韋羅莎、「老闆仔」黄梓樂呢對「母子」今日孖住出活動，佢哋話自金像獎後就冇見過面，Rosa指梓樂又成熟咗！至於梓樂就冧讚「媽咪」後生咗，要改口叫「Rosa姐姐」，搞到Rosa勁開心，呢位12歲小子把口真係勁呀！
見Rosa有多部電影作品輪住上映，其中《談判專家》係最快推出，戲中Rosa主力同男神劉青雲對戲，佢怕醜話有被電親！更自爆劉青雲之前有同老婆郭藹明，去睇佢演舞台劇，事後喺後台變小fans求合照！所以當Rosa知道可以同劉青雲拍戲係超興奮，仲意外發現對方係好talk得，而佢印象最深刻係劉青雲講入行嘅驚險過程，如果唔係一通電話，影壇就少咗位影帝！
電影《九龍城寨之圍城》成近期熱話，梓樂都有份客串一角，對住「王九」伍允龍，佢笑話當時係有被對方嘅威嚴嚇窒！梓樂又謂可惜戲份唔太重，見到其他演員咁打得，佢都想挑戰吓做打仔咁話！
