【Viu】著名音樂劇《仙樂飄飄處處聞》國際巡演香港站，今晚喺西九戲曲中心上演！「老闆仔」黃梓樂現身話第一次睇音樂劇好期待，而佢亦話有機會都想演musical，不過自嘲唱歌方面就麻麻啦！講番佢喺金像獎慶功後台，群星教佢做功課，包括有「Miss Chan」陳苡臻、「小野」盧鎮業等，老闆仔笑話就連爾冬陞主席都有坐埋去，搞到佢都有少少壓力！而事前佢就話最想同黃子華集郵，最後亦成事，勁hyper話子華神同佢講有睇《年少日記》，仲睇到喊添！
同場嘅Cath黃妍都表示心思思想挑戰音樂劇，甚至想寫musical嘅歌！提到佢首次參與金像獎盛典，Cath笑話為咗着靚靚，練着高踭鞋足一個月，企上台唱歌嗰刻係爆緊張！除咗表演緊張，Cath上台前見到男神吳慷仁，個心肝仔都起勢卜卜跳，合照嗰陣仲忍唔住向男神示愛，又冧豬話吳慷仁有叫佢唔好太緊張！至於講到佢失落最佳原創電影歌曲，Cath好firm咁話冇唔開心，因為有得入圍就已經好滿足！
另外，盧覓雪、陳志雲、小塵埃、導演陳詠燊等亦係是晚嘅座上嘉賓！即刻去片睇足本訪問！
