【viu】港產動作電影《九龍城寨之圍城》勢如破竹，城寨揸Fit人「龍捲風」古天樂今日宣布電影上映18日，票房突破6,000萬港元，係電影史上華語片總票房第十位！勁呀！
由「陳洛軍」林峯、「信一」劉俊謙 、「四仔」張文傑同「十二少」胡子彤組成嘅Kowloon Four，噚日（17日）香港時間晚上十時許開live，講到康城影展觀賞場，現場觀眾睇完起立鼓掌10分鐘，張文傑同胡子彤激動到喊，佢哋解釋之餘，仲互窒吓對方，非常搞笑！
劉俊謙仲爆咗行紅地氈一件趣事，好多外國記者認錯胡子彤係「Tony（梁朝偉）」 ，笑話：「戥佢開心嘅。」子彤一臉尷尬：「其實我都唔知點解，有少少受寵若驚，直頭有少少驚到…我？我？係咪玩緊咩遊戲節目呀？」
有網民建議林峯率Kowloon Four出一首男團歌，原來子彤跳唱都好掂，有網民更索性建議唱古天樂嘅《宇宙無限》，佢哋即時諗返起行紅地氈時，現場播放呢首歌，胡子彤冷笑一聲，林峯笑話：「要唱應該叫埋古仔一齊唱。」佢哋仲諗住，如票房破七億，就四子一齊錫古天樂，其實都唔係狂想嘅，皆因內地上映17日總票房已破5億元人民幣，朝住目標進發呀！
日前電影公司宣布，《九龍城寨之圍城》變三部曲，計劃開拍前傳《 龍頭 》與終章。開Live期間，四子亦有搵埋導演鄭保瑞入鏡講兩句，子彤問前傳有冇自己份？導演答得好含糊：「有嘅！仲係一條蟲嚟嘅！（未出世）」眾人爆笑，但肯定嘅係，林峯係有份，林峯話：「我會努力游㗎喇！」另講到外國觀眾好欣賞古天樂彈煙一幕，全場掌聲如雷，鄭導話：「佢哋嘅反應係…『就係呢啲喇！就係呢啲喇！』」
