【Viu】Gigi梁詠琪噚晚喺台北小巨蛋舉行《時間遇上我們》演唱會，除咗老公Sergio、囡囡Sofia專程飛到台灣打氣，Gigi幾位好閨蜜楊采妮、李心潔、許茹芸，同埋台灣藝人徐若瑄、溫昇豪、楊千霈等等都有捧場，一齊見證感動時刻。
完夢登蛋，Gigi特別為歌迷設計台北場獨一無二嘅專屬「全國語」歌單，獻唱超過30首國語金曲，包括國語版《花火》 、《Spaghetti》、《膽小鬼》、《新鮮》，以及7首較少公開唱嘅歌，當然唔少得令佢喺台灣歌唱事業發光嘅《短髮》啦。
Gigi嘅國語金曲又點止咁少？佢喺台上表示已經將台北嘅歌單，變成全百份百國語歌，但好多歌仲係唱唔到。為咗滿足歌迷，Gigi突然宣布好消息，透露今年七月加碼，正當大家以為佢講緊笑，佢即刻話：「我說真的，場地都已經訂了，我要歡迎大家七月份來我的梁詠琪side track演唱會。」Gigi今次攻蛋超寵粉，台灣歌迷有耳福呀！
