【Viu】 MIRROR雖然身在美國巡唱，但都不忘顧住香港鏡粉㗎！12子第二首英文團歌《Day 0》MV，今晚新鮮出爐，仲驚喜搵嚟NBA超級球星Dame D.O.L.L.A合作，參與Rap部份。而MV都唔講得笑，重金請到曾執導Bruno Mars《Just The Way You Are》MV嘅荷里活著名導演Ethan Lader，孖住Kevin Boston執導，大癲呀！
出名鍾意籃球嘅姜濤勁興奮，拍MV當日仲同工作人員爭嘢做添！「Dame有個咪嘴位，要拍傳波嘅shot，我搶住要傳波，機會千載難逢！」Fans之一嘅Edan都開心到瞓唔着：「Dame係而家NBA嘅Super Star，今次可以同佢合作係好Crazy同夢幻，但其實我哋都覺得，如果我係佢，都未必肯過嚟拍MV，仲要特登錄呢首歌，所以今次好開心。而Dame好Friendly冇架子，又肯同我哋傾偈影相簽名，係一個好友善、好Nice嘅超級巨星。」
Dame對MIRROR亦有讚冇彈：「第一次見到MIRROR，最深印象係竟然會有咁多人去組成一個Group，大家仲要擁有同一理念去達至成功。其實愈多人喺埋一齊，就愈難去做得到做得好，所以我都好奇佢哋點樣做，然後發現佢哋都好專注去做好件事，係一隊好特別嘅組合。」
今次嘅Crossover大家都話好新鮮，AK：「我哋體驗到外國拍攝Crew做嘢嘅方法，佢哋都好有條理去解釋俾我哋聽，慢慢去做。」想睇更多MV製作嘅分享，快啲click入睇片嘞！
