【viu】Ashley張鎬濂今日為新城節目做嘉賓，媽咪洪欣兼任助手陪囝囝到場，但因素顏不願出鏡。Ashley開心指自參加選秀節目後人氣急升，依家最想拍港產片，仲話有機會想同媽咪洪欣做對手戲，試吓發脾氣鬧交，必要時劇本要掌摑都頂硬上！
除咗喺戲劇上嘅發展，Ashley希望可以喺音樂方面帶作品畀fans！對自己喺選秀節目11強止步，佢坦言感到可惜，亦指見到fans唔開心自己都心情唔好！傳聞指有fans為偶像課金18萬投票，但最終偶像未能出道而大鬧主辦造馬，Ashley話有睇到相關報道，首先希望班fans可以攞番啲錢，並謂fans係好落力支持偶像！
「Loong 9」一出道個名即引起迴響，Ashley直言以廣東話讀可能會有少少尷尬，亦有同唔識廣東話嘅好友解釋，笑話佢哋知道後反應都好大！另外，同日范振鋒宣布升職好消息，由節目主持升為藝人經理人及項目總監，愛妻李思欣帶埋束花兼鎮宅錢箱現身獻吻祝賀！范總監笑話開始覺得身負重任，目標今年簽5個音樂單位，預計一男一女、一隊樂隊等，主要以音樂為主！仲透露依家草擬緊合約，莫非首位藝人係李思欣？即刻去片睇范監點講！
