【Viu】第十七屆亞洲電影大獎頒獎典禮今晚喺西九戲曲中心舉行，出席藝人、頒獎嘉賓及候選電影人，於傍晚5時左右開始進入紅地毯，現場星光熠熠，包括張藝謀、是枝裕和、李英愛、梁朝偉、劉嘉玲、鈴木亮平、趙麗穎、許瑋甯、泰男神Win Metawin、蔡卓妍、黃梓樂、范冰冰、陳欣妍、林明禎、袁澧林、柯煒林、陳靜、吳家忻、梁洛施、陳湛文、關錦鵬、李駿碩、吳慷仁等等都有出席！
久未喺香港露面嘅內地女神范冰冰，是夜負責頒發「最佳男主角」，佢喺紅地毯受訪時話有回家嘅感覺！冰冰話所有男主角都好優秀，特別點名睇好日本影帝役所廣司、金馬影帝吳慷仁！講到佢被fans喺香港outlet「野生捕獲」同男伴shopping，疑有新戀情？佢澄清係識咗20幾年嘅朋友張帥，努力搵男友中，更自爆大把追求者！
而香港女神Dada陳靜性感現身，自認做足安全措施，仲為咗靚靚而節食同做Gym。講到現場雲集男神，Dada嘅集郵list竟然唔係仔，而係女神范冰冰！講講吓，佢DaDa同冰冰都好似有啲似樣喎！
至於台灣女神許瑋甯事隔5、6年再嚟香港，佢孖導演陳以文頒發「最佳男配角」，怕醜話想同梁朝偉集郵！佢笑話此行只快閃3日，所以今朝勁早起身去飲茶，食最愛嘅蝦餃，老公邱澤因為要開工就冇同行！有指瑋甯備孕中，佢回應順其自然，仲有排工作，更預告會嚟香港拍戲添呀！
Will柯煒林同女神林明禎齊齊行紅地氈，當然開心仔啦，當明禎跣一跣時，仲好gentlement咁「隔空扶」，其後當傳媒起哄二人拍咀戲時，Will 即嘟嘴扮錫，明晒啦！而明禎就話病足一個月，搞到上圍縮水，我見猶憐呀！
