【Viu】樂隊RubberBand今晚平安夜喺九展順利完成頭場音樂會，首次喺聖誕兼跨年檔期開騷，四子騷後受訪表示好開心，感覺似開party，又搞笑話下次想喺農曆新年開騷，因為有得收利是！RB講到重回第一次搞騷之地Star Hall，都不禁話有少少感觸，笑話記得當年青澀、賣唔晒飛嘅演出畫面，到依家6場爆滿變K房，加上九展明年重建，應該係最後一次喺呢個舞台開騷！
隊中較眼淺嘅6號笑話有盡量控制好情緒，頭場頂多係眼濕濕，又大讚fans大合唱係強力嘅support！問到四子嘅另一半都有嚟捧場？泥鯭指唔使講到明係邊嘅，相反阿正嘅老婆Sherine同3歲寶貝囡「豆豆」就大方企定定影相，見豆豆面對鏡頭勁淡定，相當可愛，阿正沾沾笑話囡囡見慣大場面！RB喺呢一年主力走tour，四子話希望明年繼續周圍去表演，最想係完成阿正嘅心願，去佢最愛之地演出，想知喺邊度就留意足本訪問啦！
