【Viu】英皇電影《爆裂點》今日舉行定檔發佈會，林超賢導演、張家輝、William陳偉霆、Isabella梁洛施、周秀娜、許恩怡、楊天宇同朱鑑然等齊齊坐郵艇宣傳，落船時，家輝哥同William畀Fans包圍，仲大叫「渣渣輝」、祝William生日快樂兼上前合照，場面墟冚！
席間家輝哥代表《爆》片送上蛋糕預祝William聽日38歲生日，壽星仔話最開心喺香港過生日，可以孖同日生日嘅媽咪、阿姨同阿嫂慶祝。家輝哥就分享拍攝難忘事，仲讚William超博命，吓吓想打死人咁，搞到自己唔敢怠慢，仲拗柴，笑Cry呀！
至於林導就獲女神Isabella同娜姐「左擁右抱」受訪，笑言恨咗好耐有咁多女角色；娜姐就自爆「使橫手」吸引導演注意力。想知《爆裂點》有幾癲？記得睇足本訪問喇！
