【Viu】古天樂旗下嘅天下一電影製作，今年4月喺大馬設立分公司，首部拍攝嘅懸疑電影《尾隨》噚日（16日）於吉隆坡正式開工！戲中演私家偵探嘅古仔，同周秀娜係一對貌合神離嘅夫妻，佢調查一宗通姦案時，竟反被調查對象威脅，繼而再捲入兇殺案嘅危機當中。而劉冠廷係電影嘅關鍵人物之一，黃浩然就同楊偲泳有對手戲，都係私家偵探嘅張兆輝係古天樂嘅好友。
今次係古仔繼2016年為電影《使徒行者》宣傳後，相隔七年再到大馬公開亮相。佢讚當地有好多美食，但竟然連塞車都鍾意，佢笑笑口話：「我覺得幾好，俾我有時間休息。我喺車上瞓咗三次仲喺車龍中，夠時間去食碗雲吞麵，返來仍然係繼續塞車。」周秀娜就分享喺大馬拍戲去洗手間嘅經歷，仲話要同古老闆多啲溝通，古仔話：「佢呢一生同我演戲都係一件好痛苦嘅事。」想知有幾痛苦，就即刻睇片啦！
